Fortalezas do Reino de Galicia, FOREGA é unha páxina web creada co obxectivo de difundir o importante patrimonio cultural asociado ás fortificacións construídas en Galicia durante a Idade Media e a Idade Moderna, e máis concretamente na provincia da Coruña.

Castelos, torres, baterías, fortes e redutos contribuíron decisivamente a conformar durante séculos a paisaxe cultural galega. Durante o desenvolvemento do feudalismo, os castelos e torres foron símbolo e centro de poder para os señores, pero tamén elementos de coerción, exercicio dos dereitos xurisdiccionais e recadación de impostos. As súas características construtivas, localización e distribución corresponden a unha lóxica histórica, cun tipo de relacións sociais e con formas específicas de guerra vinculadas ao mundo feudal. As fortalezas construídas ao longo da Idade Moderna obedecen a diferentes lóxicas e dinámicas marcadas polo proceso de consolidación do Estado moderno, polas necesidades defensivas derivadas dos conflitos con potencias estranxeiras como Inglaterra e Portugal, e polos cambios no tipo de guerra, onde o desenvolvemento da artillería será o factor determinante.

Trátase dunha páxina que nos achega a un patrimonio en gran parte descoñecido para o gran público e faino desde unha perspectiva didáctica, cun amplo soporte visual de fotografías, ilustracións e mapas, e seleccionando tamén as fortificacións que se consideran máis relevantes e aquelas que son actualmente visitables.